Msemaji Mkuu wa Serikali: Serikali Imefanya Mambo Makubwa Sana Ndani ya Miaka Hii Mitatu

Serikali ya Awamu ya Tano inayoongozwa na Rais wa Jamhuri ya Muungano wa Tanzania Dkt. John Pombe Magufuli, imefanya jitihada kadhaa ikiwa ni sambamba na kutekeleza  sera mbalimbali ambazo zimeiwezesha nchi ya Tanzania kupata mafaniko makubwa ndani na nje ya nchi katika kipindi  cha miaka mitatu

Akizungumza  jana jijini Dar es salaam, Mkurugenzi wa Idara ya Habari-MAELEZO na Msemaji Mkuu wa Serikali Dkt. Hassan Abbasi, ametaja mambo 10 muhimu  yaliyofanywa na  Serikali ya Awamu ya Tano inayoongozwa na Rais wa Jamhuri ya Muungano wa Tanzania Dkt. John Pombe Magufuli katika kipindi cha miaka mitatu na ambayo yameitangaza nchi ya Tanzania kimataifa.

Dkt. Abbasi alitaja mambo hayo kuwa ni uchumi unaoendelea kukua kwa kasi nzuri, ambapo  katika mwaka 2017/18 uchumi wa Tanzania ulikua kwa wastani wa asilimia 7.1 na kuongoza katika nchi zote za Afrika Mashariki, huku  ukiingia katika rekodi ya kuwa miongoni mwa nchi ambazo uchumi wake unakua kwa kasi zaidi duniani kama ambavyo  ripoti mbalimbali za kimataifa zimeeleza.

“Uchumi wetu ni wa tisa kwa ukuaji wa kasi duniani na katika Afrika, Kusini mwa Sahara ni wanne, hiyo ni kwa mujibu wa ripoti ya World Economic Forum ya mwezi  Machi, 2018 na kwa nchi za Afrika Mashariki  uchumi wa Tanzania unaongoza kwa ukuaji” alisema Dkt. Abbasi

Kuongezeka kwa mapato ya Serikali katika kipindi cha miaka mitatu, Rais Magufuli amethubutu kuziba mianya ya upotevu wa mapato na kuongeza kasi ya kukusanya kodi na hivyo kuongeza mapato ya kodi ya Serikali kutoka wastani wa shilingi  bilioni 850 kwa mwezi hadi kufikia wastani wa  shilingi trilioni 1.3 kwa mwezi.

Kufufuliwa kwa mashirika ya umma, Dkt. Abbasi alisema kuwa kutokana na ufuatiliaji, ubunifu, uwekezaji wa Serikali ya Rais Magufuli, mashirika mengi  mfano  Shirika la Mawasiliano Tanzania(TTCL), Shirika la Reli Tanzania (TRC) na Mamkala ya Maji Safi (DAWASA) na Bandari  sasa yameanza kuamka kuwa na ufanisi, kuongeza mapato na mengine kutengeneza faida.

“Baadaa ya Serikali kuchagiza mageuzi ya kiutendaji sasa  kwa mwaka TTCL  inakusanya shilingi bilioni 212 kutoka shilingi bilioni 102, Bandari imekusanya kutoka shilingi bilioni 703 hadi kufikia shilingi bilioni 838 kwa mwaka, TRC kutoka shilingi bilioni 23 hadi 36 kwa mwaka  na DAWASA shilingi bilioni 32.4 hadi shilingi bilioni 122.4 kwa mwaka “ alisema Dkt. Abbasi

Aidha, Dkt. Abbasi alisema kuwa katika kipindi hiki cha miaka mitatu Serikali ya Rais Magufuli imefanikiwa kwa kiasi kikubwa katika sekta ya  viwanda ambapo jumla ya  viwanda 3,306 viliandikishwa, na vingine vinaendelea kujengwa na baadhi vimekamilika. Halikadhalika viwanda hivyo vimeanza kutengeneza  bidhaa mbalimbali ambapo kati ya hivyo viwanda 251 ni vikubwa na vya kati ni 173.

Ambapo mchango wa ekta ya viwanda katika pato la Taifa umeongezeka kutoka asilimia 5.2 mwaka 2015 hadi 5.5 mwaka 2017. Kasi ya ukuaji wa Sekta ya Viwanda ilikua kutoka asilimia 6.5 mwaka 2015 hadi asilimia 7.1 mwaka 2017/18.

Akiendelea kufafanua mafanikio ya Serikali ya Awamu ya Tano Dkt. Abbasi alisema kuwa Rais Magufuli amepambana na rushwa na ufisadi kwa pamoja na mambo mengine, sambamba na  kutimiza ahadi yake ya kuunda Makosa ya Uhujumu Uchumi maarufu kama Mahakama ya Mafisadi

“Mpaka sasa kesi mpya 41 zimefunguliwa, na  kuna maombi ya dhamana 346 yamewasilishwa katika Mahakama hii kati ya mwaka  2017 na 2018” alisema Msemaji huyo wa Serikali.

Katika sekta ya usafirishaji nako, Serikali ya Rais Magufuli imefanya mageuzi kadhaa, yaliyopelekea sekta hiyo kupata mafaniko  ya kuwa  na  ndege nne mpya zinazoendelea kuleta mageuzi katika usafiri wa anga nchini, abiria wanaotumia ndege za ATCL wameongezeka kutoka takribani abiria 4,000 kwa mwezi hadi abiria 30,000 kwa mwezi.

Aliongeza kuwa  ndege mbili   aina ya Air Bus zenye uwezo wa kubeba abiria watu 132 zitawasili nchini Disemba mwaka huu, na ndege aina ya  Boeing dreamliner ya pili inatarajiwa kuwasili nchini Oktoba mwaka mwakani.

Aidha, mradi wa umeme wa Stigler’s gorge utakapokamiika unatarajiwa kuzalisha  megawati 2,100, sambamba na mradi wa ujenzi wa reli kwa kiwango cha standarg gauge kutoka Dar es salaam hadi Morogoro na baade Dodoma, ambapo umefikia 33% ya ujenzi.

Mafaniko mengine ya Serikali hii yanaonekana katika katika sekta ya afya,  ikiwemo kujenga vituo vya Afya vya Kata 210 na kukarabati vingine vingi kufikisha idadi ya vituo vinavyotoa huduma hadi mwaka huu kuwa 7,746 kutoka vituo 7,014 mwaka 2014/15 sawa na ongezeko la asilimia 10.4.

 Dkt. Abbasi  alifafanua kuwa vituo hivi pia vina wodi za kina mama na vifaa vya kisasa. Aidha, ajira zaidi ya 6,000 za kada ya afya zimetolewa. Katika miaka mitatu Zahanati zimeongezeka kutoka 6,143 mwaka 2015 hadi 6,646 mwaka huu ikiwa ni sawa na  ongezeko la zahanati 503  ambapo baadhi zilijengwa na zingine kukarabatiwa sawa na ongezeko la asilimia 8.1.

Vilevile, Serikali ya Awamu ya Tano imefanya mageuzi ya kiutendaji ikiwemo kuongeza Bajeti ya Dawa na Vifaa Tiba kutoka shilingi bilioni 31 mwaka 2015 hadi kufikia shilingi bilioni 270  kwa mwaka huu wa fedha.

Ongezeko hilo limewezesha upatikanaji wa dawa muhimu katika vituo vya kutolea huduma za afya nchini kufikia asilimia 89.6 kutoka asilimia 36 mwaka 2015/16. Aidha upatikanaji wa dawa muhimu umepanda kutoka wastani wa asilimia 35 tu hadi asilimia 93.

Sekta ya madini nayo, Dkt. Abbasi alisema kuwa “Serikali iliweka lengo la kukusanya shilingi bilioni 1.5 kwa mwaka kutoka kwa wachimbaji wadogo wa Tanzanite pale Mirerani. Hata hivyo kabla hata ya nusu ya mwaka huu wa bajeti kufika, tayari mapato eneo la Tanzanite yamefikia shilingi milioni 788.5 sawa na asilimia 52 ya lengo la mwaka 2018/19, hii inashadidisha kuwa uamuzi wa Mhe. Rais kujenga ukuta ulikuwa makini” alisema Dkt. Abbasi

Katika miaka hii mitatu licha ya matukio ya hapa na pale, Tanzania imeendelea, kusimama kama moja ya visiwa vya amani duniani na  Taifa limeendelee kushikamana kawa kuishi kwa amani na upendo.

Aidha, Dkt, Abbasi  alisema kuwa Rais Magufuli anasimamia misingi na Watanzania leo wako huru  kuamua mambo yao kama Taifa, huku akisisitiza  kuwa safari ya kujitegemea imeanza  na mataifa mbalimbali duniani  yanafahamu   azma ya Rais Magufuli kwa Taifa lake.

Soma Zaidi>>>

DC Muro Awatia Mbaroni Watuhumiwa Watatu Walioshiriki Kumtoa Mimba Mwanafunzi

Mkuu wa Wilaya ya Arumeru kwa kushirikiana na Jeshi la polisi Wilaya ya Arumeru limewakamata watuhumiwa wa Tatu ambao wameshiriki kumtoa mimba mwanafunzi wa kidato cha nne kwa kutumia dawa za miti shamba suala ambalo linachochea mimba kwa wanafunzi na kuzorotesha elimu yao.

Dc Muro amesema kuwa wamebaini tukio hilo baada ya kuweka mtego na kuwabaini watuhumiwa hao pamoja na mtia mimba ambao wamefikishwa polisi kwa ajili ya kufikishwa mahakamani

Akielezea jinsi alivyopewa ujauzito na kisha ujauzito kutolewa aikaeli Pallangyo amesema ni kweli alipata ujauzito Kwa kurubuniwa na kijana wanaeishi nae Jirani nyumbani ambae alikuwa akimrubuni Kwa kumpatia fedha

Kwa upande wao watuhumiwa wa sakata hilo kijana aliempa mimba Binti,pamoja na mama Mzazi wa Aikaeli na mwanamke ambae ni ndugu wa Kijana aliempa mimba ambae anatajwa kuhusika na kumtoa ujauzito Binti wametoa sababu mbalimbali ambazo hata hivyo zimeonekana kukinzana zenyewe Kwa zenyewe Kutokana na mama wa Binti kukiri Kuwafahamu watuhumiwa wenzake na kuelezea tukio la Mchezo mzima ulivyokuwa

Akidhibitisha taarifa Za Binti huyo kuwa mjamzito na kutoa ujauzito, Mganga mkuu wa halmashauri ya Meru Daktari Cosmas kilasara amesema vipimo vya awali vilionyesha Binti kuwa mjamzito na vipimo walivyofanya tena vimeonyesha Binti sio mjamzito tena ambapo amesema hata hivyo Binti huyo ameendelea kupata dalili zote Za kuwa na ujauzito ikiwemo ya maziwa kutoka.

Kutokana na tukio hilo Mkuu wa Wilaya ya Arumeru amevigiza vyombo vya Usalama kuwafikisha mahakamani watuhumiwa wote ambao wamehusika katika tukio hilo , ambapo pia amelitaka jeshi la Polisi kuhakikisha wanawakamata na wanawafikisha mahakamani watu wote waliohusika katika kuwapa ujauzito wanafunzi 57 Kwa kipindi Cha miaka miwili iliyopita.

Imetolewa na Ofisi ya Mkuu wa Wilaya ya Arumeru

Soma Zaidi>>>

Bunge Kuanza Leo Jumanne

Mkutano wa 13 wa Bunge unaanza leo, huku miswaada ya sheria mitano ikitarajiwa kusomwa kwa mara ya kwanza ikiwemo wa sheria ya vyama vya siasa ya mwaka 2018.

Spika wa Bunge, Job Ndugai  leo amesema miswada mingine ni wa maji na usafi wa mazingira, marekebisho ya sheria mbalimbali namba nne wa mwaka 2018, muswada wa mamlaka ya hali ya hewa wa mwaka 2018 na wa mamlaka ya usimamizi wa usafiri wa nchi kavu.

"Pia kuna muswada wa sheria za huduma ndogo za fedha wa mwaka 2018 ambao utasomwa katika hatua zake zote. Hati ya dharura ya mheshimiwa Rais nimeshaipokea na kamati ya uongozi imeridhia kusomwa katika hatua zake zote," alisema.

Aidha, alisema wabunge wanne watakula kiapo kesho ambao wote ni wa CCM,  Thimotheo Mzava (Korogwe Vijijini), Mwita Waitara (Ukonga), Julias Kalanga (Monduli) na Zuberi Kuchauka (Liwale).

Alisema pia katika mkutano huo mapendekezo ya mpango wa maendeleo wa mwaka 2019/20 utajadiliwa na sehemu kubwa mijadala itajikita katika mpango huo.

Ndugai aliongeza kuwa, maswali 125 yataulizwa na ya papo kwa waziri mkuu yatakuwa 16.

Soma Zaidi>>>

Kimewaka tena: Marekani Yaiwekea Vikwako Iran....Jeshi La Iran leo Kufanya Mazoezi Makubwa Kuonesha Ubabe Wao

Marekani imetangaza kuwa leo Nov 5 imeirejeshea vikwazo nchi ya Iran vitakavyolenga sekta ya mafuta na sekta ya kifedha.

Marekani imesema imeiwekea Iran vikwazo vigumu zaidi ambavyo haijawahi kuiwekea. Vikwazo hivyo vitalenga mauzo ya mafuta, usafiri kwa njia ya baharini na mabenki ambavyo vyote ni muhimu sana kwa uchumi.

Maelfu ya raia wa Iran wakiwa na mabango yaliyoandikwa  "Kifo kwa Marekani" wameandamana  wakiitaka serikali  yao kutofanya mazungumzo yoyote na Marekani.

Jeshi la Iran nalo limesema kuwa litafanya mazoezi ya kijeshi leo Jumatatu na Jumanne kuonyesha uwezo wake wa kijeshi.

Marekani imetangaza vikwazo hivyo  baada ya  Rais Trump kutangaza  kujitoa kwenye  mkataba wa mwaka 2015 uliolenga kupunguza mipango ya nyuklia ya Iran.

Marekani inasema inataka kuzima vitendo viovu vya Ina vikiwemo udukuzi wa mitandao, majaribio ya makombora ya masafa marefu na uungaji mkono wa makundi ya kigaidi mashariki ya kati.

Zaidi ya watu 700, kampuni, vyombo vya habari na ndege kwa sasa vimewekewa vikwazo, yakiwemo mabenki makubwa, wauza mafuta na kampuni za usafiri wa baharini.
 

Wakati hayo yakijiri, Uingereza , Ujerumani na Ufaransa ambazo ni kati ya nchi zilizo kwenye makubaliano ya nyuklia zote zimekataa vikwazo hivyo vya Marekani dhidi ya Irani.

Zimeahidi kuzisaidia kampuni za Ulaya zinazofanya baishara halali na Iran na kubuni njia mbadala za malipo ambazo zitasaidia kampuni kufanya bishara bila ya vikwazo vya Marekani

Soma Zaidi>>>

NEMC Yakifungia Kiwanda cha Nyama ya Punda

Baraza  la Usimamizi wa Mazingira nchini (NEMC), limekifungia kiwanda cha kusindika nyama ya punda kilichopo kwenye Jiji la Dodoma, baada ya ukaidi wa muda mrefu wa mmiliki kufuata taratibu sahihi za uhifadhi wa mazingira.

Barua iliyoandikwa na Kaimu Mkurugenzi wa NEMC, Dk. Vedast Makota,  imeeleza kwamba, kiwanda hicho ambacho kinashughulika na uchinjaji na usafirishaji wa nyama ya punda nje ya nchi, kwa muda mrefu sasa kimeonyesha kushindwa kuzingatia taratibu za uhifadhi wa mazingira, licha ya onyo na ukumbusho kadhaa uliofanywa na baraza.

“Kufuatia mlolongo huu wa uchafuzi wa mazingira, ambao umekuwa ni kero kwa majirani na ambao unaleta mashaka kwenye ubora wa bidhaa, Baraza limefikia hatua ambayo linakosa cha kushauri zaidi ya kufunga kiwanda,” imeeleza barua hiyo.

Kwenye maelezo ya ufungaji wa kiwanda hicho, Dk. Makota alisema: “Kwa mamlaka yaliyokabidhiwa kwa Baraza chini ya Kifungu cha 196(2) cha Sheria ya Usimamizi wa Mazingira ya mwaka 2004, unaamuriwa kusimamisha shughuli zote za uzalishaji kuanzia siku ya agizo hili mpaka utakapochukua hatua kikamilifu za kutekeleza maagizo yote uliyopewa hapo awali,” ilieleza barua hiyo

Kiwanda hicho ambacho kinamilikiwa na kampuni inayofahamika kama Huwachen Company Limited, kimekuwa kwenye mvutano wa muda mrefu na Baraza pamoja na Wizara inayohusika na uhifadhi wa mazingira tangu Mei, mwaka huu, ambapo aliyekuwa Naibu Waziri Ofisi ya Makamu wa Rais (Muungano na Mazingira), Kangi Lugola, alitembelea na kueleza kutoridhishwa kwake na hali ya uhifadhi wa mazingira.

Ziara hiyo ya Naibu Waziri ilitokana na ukaguzi wa NEMC uliofanywa Agosti, mwaka huu kwa lengo la kutathmini hali ya uhifadhi wa mazingira kwenye kiwanda hicho kutokana na shughuli zake. Katika tathmini hiyo, suala la uchafuzi wa mazingira liliendelea kuonekana kuwepo.

Mambo yaliyoonekana kuwa ni tatizo ni pamoja na mabaki ya damu kwenye eneo hilo ambayo yalipelekea uwepo wa nzi wengi, kuziba kwa mitaro ya kupitisha maji machafu, kukosekana kwa utaratibu madhubuti wa kuhifadhi mbolea, kiwango duni cha shimo la kuhifadhia uchafu, harufu mbaya na ukosekanaji wa mpango endelevu.

Mapungufu hayo kwa mujibu wa taarifa hiyo ya Mkurugenzi wa NEMC yanakiuka vifungu kadhaa vya sheria ya mazingira ya mwaka 2004, hii ni pamoja na kifungu cha 106 (1) (2) na (6) pamoja na kifungu cha 187 (1) (b) na (C).

Soma Zaidi>>>

RC Makonda Afunguka Siri Ya Kumwaga Machozi Kanisani...."Watu Wanadhani ni Utani, Ila Mbinguni Wanajua"

Siku moja baada ya Mkuu wa Mkoa wa Dar es salaam Paul Makonda kutokwa na machozi akiwa katika ibada katika kanisa la Efatha linaloongozwa na mtumishi wa Mungu Josephat Mwingira kiongozi huyo ameibuka na kutoa neno.

Kupitia ukurasa wake wa Instagram Makonda amechapisha video ambayo alionekana  anatokwa na machozi kanisani hapo na kuandika ujumbe ambao alibainisha watu wengi hawajui kilichotokea.

Makonda ameandika; “Powerful, very powerful watu hawaelewi nini kimefanyika Ila mbinguni wameelewa na wameandika, people think it’s a joke. Ila kwa Mungu hakuna mzaha, asante Mungu Kwa kusimama upande wangu”

Hivi karibuni Mkuu wa huyo wa Mkoa Dar es salaam alianzisha kampeni maalum ya kuwakamata watu wanaojihusisha na mapenzi ya jinsia moja, na kuunda kamati maalum ya watu 17 ili ya kushughulika na suala hilo.

Jana kupitia ofisi ya Wizara ya Mambo ya Nje,  serikali ilisema zoezi linaloendeshwa na Mkonda  ni mawazo yake binafsi na si msimamo wa serikali.

Soma Zaidi>>>

TFF Yamfungia maisha aliyekuwa Mwenyekiti wa Kamati yake ya Uchaguzi, Wakili Revocatus Kuuli

Shirikisho la Soka Tanzania (TFF) kupitia Kamati ya Maadili limemfungia maisha kutojihusisha na soka aliyekuwa Mwenyekiti wa Kamati yake ya Uchaguzi, Wakili Revocatus Kuuli baada ya kukutwa na hatia ya makosa matatu ya kimaadili.

Mwenyekiti wa kamati ya maadili ya TFF, Wakili Hamidu Mbwezeleni alisema Kuuli akitambua nafasi yake ndani ya shirikisho hilo, alifanya makosa hayo matatu ambayo kimsingi yanastahili adhabu ya kifungo cha maisha kujihusisha na masuala ya mpira wa miguu.

Makosa matatu ambayo yamemtia hatiani Wakili Kuuli ni kusambaza nyaraka za shirikisho kinyume na kanuni na taratibu, kutoa maelezo yanayoonesha kuwa na mgongano wa kimaslahi kwa kuwapa watu wasiohusika na pia kufanya vitendo vinavyoshusha hadhi ya shirikisho.

"Uamuzi huu umechukuliwa kwa kufuata kanuni na taratibu. Hakuna aliyemuonea Kuuli niliweke hilo sawa," alisema Wakili Mbwezeleni.

Soma Zaidi>>>

Mwanafunzi afariki kwa kukatwa mguu akichunga ng’ombe

Aliyekuwa mwanafunzi wa Shule ya Msingi Kisangura wilayani Serengeti, Mkoa wa Mara, Emmanuel Nyakitare, (15), amefariki baada ya kukatwa mguu kwa panga na mwanafunzi mwenzake wakiwa wanachunga ng’ombe.

Emmanuel alifariki wakati akisubiri matokeo ya mtihani wa darasa la saba, yaliyotangazwa hivi karibuni. Chanzo cha tukio ni kugombania eneo la kulisha mifugo baada ya mtuhumiwa, Charles Kaheke (13), mwanafunzi wa darasa la sita katika Shule ya Msingi Kisangura kumkata kwa panga marehemu kwa kumtuhumu kulisha mifugo eneo lisilo lake.

Ofisa Tarafa ya Rogoro, Gasper Richard, alisema tukio hilo lilitokea Oktoba 29, mwaka huu, baada ya wanafunzi hao kugombana na baada ya kutenda kosa hilo mtuhumiwa alikwenda shuleni bila mfuko wa madaftari kama ilivyo kawaida, mwalimu wake alipomuuliza kwa nini hakuwa na daftari akamjibu mwalimu kwamba amnunulie ampe.

“Siku ya tukio marehemu alikwenda kuchunga mifugo yao eneo hilo jirani na nyumbani kwa akina Kaheke, (mtuhumiwa) ambaye alipotoka shule kuja kupata chakula cha mchana alimkuta marehemu eneo hilo, katika kuzozana ndipo mmoja alimkata mwenzake kwa panga na kuvuja damu nyingi,” alisema.

Akielezea tukio hilo, Mkuu wa Wilaya ya Serengeti, Nurdin Babu, alisema lilitokea Oktoba 29, mwaka huu, kati ya saa 6 na saa 7 mchana, wakati wanafunzi hao wakichunga mifugo, ndipo ulipozuka ugomvi kugombania eneo la malisho, ndipo mtuhumiwa alikasirika na kumkata mguu mwenzake kwa panga, hivyo kuvuja damu nyingi na kusababisha kifo chake.

“Hata hivyo, baada ya kuona amesababisha kifo cha mwenzake alitokomea na kukimbia kwenda kusikojulikana na mpaka sasa haijulikani alipo na marehemu Nyakitare alikuwa akisubiri matokeo ya darasa la saba mwaka huu, baada ya kufanya mtihani,” alisema Babu.

Babu, ambaye ni Mwenyekiti wa Kamati ya Ulinzi na Usalama ya Wilaya ya Serengeti, alisema baadaye wazazi wa mtuhumiwa walikwenda kwa familia ya marehemu na kuomba msamaha na kuahidiana mambo ambayo hayakuwekwa wazi, hivyo kulimaliza suala hilo bila kufika Ofisi ya Mkuu wa Wilaya kwa hatua zaidi.

Soma Zaidi>>>

Breaking News: Mahakama Yamwachia Huru Mwenyekiti wa Mtandao wa Wanafunzi (TSNP), Abdul Nondo

Mahakama ya Hakimu Mkazi Iringa imemuachia huru Mwenyekiti wa Mtandao wa Wanafunzi (TSNP), Abdul Nondo leo Novemba, 5  baada ya upande wa Jamhuri kushindwa kuthibitisha makosa mawili yaliyokuwa yanamkabili

Nondo alikuwa anakabiliwa  na mashtaka mawili; shitaka la kwanza ni kusambaza taarifa za uongo akiwa jijini Dar es Salaam kuwa ametekwa na kosa la pili ni kutoa taarifa za uongo akiwa mjini Mafinga kwa askari Polisi kituo cha Mafinga Wilayani Mufindi.

Soma Zaidi>>>

Mwanafunzi Atishia Kujinyonga Kisa Kulazimishwa Kwenda Shule

Mwanafunzi wa kike (15) aliyekuwa kidato cha kwanza Shule ya Sekondari Nsemlwa, Manispaa ya Mpanda, mkoani Katavi amenusurika kujiua kwa kujinyonga baada ya baba yake Bushiri Joseph, kumuwahi akiwa tayari amepanda juu ya kiti baada ya kulazimishwa kuendelea na masomo.

Mwanafunzi huyo pamoja mwenzake wa kiume mwenye umri wa miaka 16, anayesoma kidato cha pili katika shule hiyo, wanadaiwa kuwa watoro sugu na kutishia kujiua kwa kujinyonga kwa kamba au kunywa sumu iwapo wazazi na walimu wao wataendelea kuwalazimisha kuendelea na masomo.

Licha ya kuhojiwa na wazazi na walimu wao, wanafunzi hao hawakuwa tayari kueleza kinachowasababisha wakatae kuendelea na masomo na badala yake wamekuwa wakitishia kujiua kama watalazimishwa kurejea shuleni.

Inadaiwa kuwa wazazi wa wanafunzi hao wameshawafikisha kituo cha polisi bila mafanikio, wakiwa na msimamo wao wa kujiua.

Mwalimu Mkuu wa shule hiyo, Edgar Mwaisunga, aliwaambia waandishi wa habari kuwa mwanafunzi huyo alifikishwa na baba yake mzazi shuleni hapo kujiunga na kidato cha kwanza Januari, mwaka huu.

"Baba yake alikuwa amemnunulia kila kitu alichohitaji binti yake, lakini miezi miwili baadaye alianza utoro, tukimhoji alikuwa akidai kuwa hataki kuendelea na masomo...tulidhani kuwa ni mjamzito, lakini alipopimwa hakuwa na ujauzito,” alisema.

Alisema walimu walijitahidi kumsihi, lakini msichana huyo alikataa kata kata kuendelea na masomo...lakini alikuwa haelezi kwanini hataki kuendelea na masomo, huku akitishia kujiua kama atalazimishwa kuendelea na masomo," alisema.

Kwa mujibu wa Katibu wa Baraza la Kata ya Uwanja wa Ndege, Manispaa ya Mpanda, Salum Msimani, wanafunzi hao wawili ni miongoni mwa 17 wa Shule ya Sekondari Kasimba, Manispaa ya Mpanda, waliofikishwa katika Baraza la Kata na kufunguliwa mashtaka ya utoro shuleni.

"Wanafunzi hao msichana na mvulana waliokuwa wakisoma katika Shule ya Sekondari Nsemlwa, wakiwa na wazazi na walezi wao walifikishwa wiki iliyopita kwenye Baraza la Kata la Uwanja wa Ndege, Manispaa ya Mpanda na kusomewa mashtaka yao baada ya mkuu wao wa shule na bodi ya shule hiyo kuwasilisha malalamiko dhidi yao na wazazi wao kwenye baraza hilo," alieleza Msimani.

Msimami alisema wanafunzi hao wakiwa kwenye baraza hilo waliendelea na msimamo wao wa kukataa kuendelea na masomo, huku wakisisitiza kuwa kama watalazimishwa kuendelea na masomo watajiua kwa kujinyonga kwa kamba au kunywa sumu .

Alisema, walipotakiwa kueleza sababu zinazowafanya wakatae kuendelea na masomo hawakuwa tayari kuzieleza.

"Baraza hili limeshindwa kutoa hukumu dhidi ya wanafunzi hawa wawili na hata shuleni walikokuwa wanasoma walimu wameinua mikono, pia polisi wamefikishwa na wazazi wao, lakini imeshindikana wameng'ang'ania msimamo wao,” alisema na kuongeza:

“Kama Katibu wa Baraza hili la Kata natarajia kuonana na Hakimu wa Mahakama ya Wilaya ya Mpanda kwa ushauri wa kisheria," alisisitiza.

Aidha, alieleza kuwa kamba aliyotaka kujinyongea mwanafunzi wa kike na kiti alichokuwa amepanda, vipo katika ofisi za baraza hilo.

Baba mzazi wa mwanafunzi huyo wa kike, Bashir Joseph, amedai kuwa hivi karibuni alipomlazimisha binti yake kwenda shuleni aligoma na kuingia chumbani kwake alikokuwa ametundika kamba ya kujinyongea na kumkuta akiwa amepanda kwenye kiti tayari kwa kujinyonga.

Naye baba mzazi wa mwanafunzi wa kiume, Sadok Isha, amedai kuwa pamoja kuchukua hatua mbalimbali za kumfanya kijana wake huyo aendelee na masomo, lakini imeshindikana baada ya kutishia kujinyonga.

Diwani wa Kata ya Uwanja wa Ndege, Stephano Asalile, alisema kwa tukio la wanafunzi hao wawili linaonyesha jinsi ambavyo baadhi ya wazazi wa wanafunzi wamekuwa wakipewa adhabu kutokana na utoro wa watoto wao, kumbe tatizo lipo kwa watoto wenyewe.

Soma Zaidi>>>

Lugola Afanya Ziara Ya Kushtukiza Vituo Vya Polisi Tabata,Buguruni Na Kutoa Maagizo Ya Dhamana Kutolewe Saa 24

WAZIRI wa Mambo ya Ndani ya Nchi, Kangi Lugola, amefanya ziara ya kushtukiza kituo cha Polisi Tabata na Buguruni vya jijini Dar es Salaam ili kujua kama maagizo yake aliyoyatoa katika vituo mbalimbali kama yameanza kufanyiwa kazi.

Waziri Lugola alianza ziara yake saa 2:45 jana asubuhi kwa kuibukia katika kituo cha Tabata na moja kwa moja alianza kuulizia mahudhurio ya wafanyakazi wote wa kituo hicho na kujua nani yupo kazini na nani hayupo na kwanini hajafika ofisini hapo kwa muda huo wa asubuhi.

Wakati alipokua kituoni hapo, pia Lugola alikichukua kitabu cha taarifa za watuhumiwa wote waliopo mahabusu na baadaye kuelekea katika mahabusu hiyo akiwahoji watuhumiwa kwa kuwaita kwa majina kujua makosa yao yaliyoyafanya wawepo kituoni hapo.

Lugola baada ya kumaliza katika kituo hicho, saa 5:27 alielekea kimyakimya katika kituo cha Polisi cha Buguruni, na aliwahoji watuhumiwa waliopo mahabusu katika kituo hicho na kujua makosa mbalimbali yanayowakabili huku polisi wapepelezi wa tuhuma zao wakiwepo katika tukio hilo.

Akizungumza mara baada ya kumaliza ziara yake, Lugola alisema, alitoa maagizo mbalimbali katika ziara zake nchini, hivyo anafuatilia kujua maagizo yake yameanza kufanyiwa kazi au bado baadhi ya vituo kama wameyapuuza.

“Lengo la hii ziara yangu ni kuboresha utendaji kazi wa vituo vya polisi nchini, sijaja kumuadhibu mtu mimi, hivyo msiwe na wasiwasi, bali kilichonifanya hapa nije nikufuatilia maagizo mbalimbali ambayo niliyatoa kama kweli mnayafanyia kazi,” alisema Lugola.

Maagizo aliyoyatoa mwezi miwili iliyopita katika ziara zake mikoa mbalimbali nchini ni kuhakikisha pikipiki zinaondolewa katika vituo vya polisi, dhamana zitolewe saa 24 ikiwemo Jumamosi na Jumapili, pamoja na polisi kutowabambikizia kesi wananchi.

Hata hivyo, Lugola alivipongeza vituo hivyo vya polisi vilivyopo wilayani Ilala na pia Kituo Kikuu cha Polisi Dodoma alichokitembelea wiki iliyopita, kwa kuanza kuyafanyia kazi maagizo yake aliyoyatoa zikiwemo baadhi ya bodaboda, zimeondolewa vituoni na zilizobaki zina kesi mahakamani.

“Nilifanya ziara ya kushtukiza pale Kituo cha Polisi cha Tabata, na pia nimekuja hapa Buguruni, kwakweli wameaanza kuyafanyia kazi maagizo yangu, pikipiki zote nilizozikuta zinasababu yakuwepo hapo, na si vinginevyo kama walivyokua wanaziweka kiholela hapo awali,” alisema Lugola.

Pia lugola aliwataka Makamanda wa polisi nchini kuwafuatilia askari wao kwa umakini ili kujua utendaji kazi wao, na pia Waziri huyo alisema atakua anafanya ziara kama hizo mara kwa mara hivyo vituo vya polisi nchini viwe sawa muda wote.

“Hamjui siku wala saa ambapo nitakuja, tufanye kazi, tuwahudumie wananchi, tusiwaonee wananchi, tujitume kufanya kazi kwa weledi, sitamvumilia mtu ambaye atavunja utaratibu,” alisema Lugola.

Soma Zaidi>>>

January Makamba: Nilitamani Kujiuzulu Ubunge Ili Kulinda Maslahi Mapana ya Wananchi

Waziri wa Nchi Ofisi ya Makamu wa Rais Mazingira, January Makamba amesema kuwa mgogoro wa kiwanda cha Chai cha Mponde ulitaka kumfanya achukuwe uamuzi wa  kujiuzulu nafasi zake zote za uongozi kisiasa na kiserikali.

Hatua hiyo ilitokana na namna ambavyo viongozi wenzake walivyokuwa wamegawanyika katika namna ambavyo usuluhisho wa mgogoro huo ulivyokuwa ukionekana kutaka kuwanyima haki wananchi.

Waziri huyo alizungumza hayo jana Novemba 1 kwenye mkutano wa hadhara uliofanyika katika kata ya Mponde wilayani Bumbuli wakati wa ziara ya Waziri Mkuu Majaliwa Kassim Majaliwa hapo juzi.

Alisema alishadhamiria kuachana na nyadhifa zake baada ya kuona viongozi wenzake walitofautiana katika swala hilo wakidhani anamaslai nalo.

“Niliona ni wajibu wangu kusimamia haki za wananchi na maslahi yao hata kama ningetengwa na kunyanyaswa kwani naamini siku zote yule anayesimamia haki Mwenyezi Mungu hawezi kumtupa” alisema Waziri Makamba.

Amesema mgogoro huo ulileta mpasuko kwa viongozi wa ngazi ya mkoa hadi shina lakini imani yake kwa sasa ni kwamba wameelewa alichokuwa akikitetea na sasa wapo pamoja.

“Wananchi na Wakulima wa chai wameumua wamenyanyasika sana, wamedhulimiwa lakini siasa ninaimani kwa mikakati ya serikali sasa uchumi utaimarika” alisema Waziri huyo.

Hata hivyo aliiomba serikali kuwasaidia wakulima kufufua zao hilo kwa kuwapatia miche bora, pembejeo za kilimo ili kufufua zao hilo.

Katika hatua nyingine Waziri Mkuu Majaliwa Kassim Majaliwa alisema kuwa serikali imekichukuwa kiwanda hicho na sasa wapo kwenye maandalizi ya kukifufua upya.

Alisema kwa sasa wanafanya uhakiki wa madeni yote pamoja na ukaguzi wa mashine na mitambo katika kiwanda hicho ili kujiridhisha kabla hakijaanza kufanyakazi tena.

Alisema tayari deni la kiwanda ni sh Bil 4.4 na kwa sasa anataka afahamu madeni yote mpaka ya wafanyakazi wa kiwanda hicho ili baada ya hapo wajipange kwa ajili ya ulipaji wa  madeni hayo ili kiwanda kianze upya.

Katika hatua hiyo Waziri Mkuu amemuagiza meneja wa kiwanda hicho, Stephen Wahome kuhakiki idadi ya wafanyakazi waliokuwepo awali kiwandani hapo kujua madai yao ya pamoja na idadi ya vifaa vilivyokuwepo kiwandani hapo.

“Watu wote waliokuwa wakidai kiwanda hiki serikali italipa madeni yao wakati tukiendelea na jitihada za kukifufua kiwanda hiki kiweze kurudi katika hali yake ya uzalishani na wananchi waweze kunufaika” alisema Waziri huyo.

Waziri Majaliwa alisema kuwa mgogoro wa kiwanda hicho ulianza Mara baada ya wakulima kuanzisha Umoja wa wakulima wa chai UTEGA na kuusajili kama Shirika la kijamii NGOs badala ya chama cha ushirika.

Alisema kuwa chama hicho kiliwabagua wakulima na kutoa upendeleo kwa baadhi ya wakulima hali iliyosababisha mgogoro huo.

Alisema kuwa mgogoro ulikuwa zaidi baada ya viongozi wa UTEGA nao kugeukana na kuuza kiwanda kwa mwekezaji bila ya kutoa taarifa kwa wakulima wala wanachama wao.

Hivyo kutokana na kasoro hizo huku maslahi ya mkulima yakiwa madogo ndipo serikali ilipoamua kuchukuwa kiwanda chake ili iweze kukiendesha mwenyewe kwa maslahi ya wakulima na wananchi.

Soma Zaidi>>>

BREAKING: Treni ya abiria Dar yapata ajali na Kujeruhi Watu 9

Treni ya abiria inayofanya safari zake kati ya Stesheni na Pugu, jijini Dar es Salaam imepata ajali baada ya mabehewa yake mawili kuanguka eneo la Karakata wilayani Ilala na kujeruhi watu 9, leo asubuhi, Ijumaa, Novemba 2, 2018.

Kamanda wa Reli nchini, David Mnyambuga amethibitisha kutokea kwa ajali hiyo na kusema mabehewa hayo mawili yameharibika vibaya na kwamba majeruhi tayari walikimbizwa hospitali kwa ajili ya kupatiwa matibabu.

Soma Zaidi>>>

Polisi wafanya upekuzi nyumbani kwa Zitto Kabwe

Jeshi la Polisi Mkoa wa kipolisi Kinondoni limefanya upekuzi nyumbani kwa Kiongozi wa Chama cha ACT- Wazalendo, Zitto Kabwe.

Jebra Kambole, wakili wa mbunge huyo wa Kigoma Mjini amesema kuwa upekuzi huo umefanyika Masaki jijini hapa, nyumbani kwa mbunge huyo.

Jana  asubuhi Zitto alikamatwa na polisi akiwa nyumbani kwake na kupeleka katika Kituo cha polisi Oysterbay ambako alihojiwa kwa saa tatu na kuhamishiwa kituo kikuu cha polisi.

Kambole amesema baada ya mteja wake kupelekwa kituo kikuu cha polisi, hakulala hapo alihamishiwa kituo kingine kilichopo Mburahati ambako aliondolewa leo asubuhi na kurudishwa kituo cha polisi Oysterbay.

“Leo asubuhi mteja wangu aliongozana na polisi hadi nyumbani kwake Masaki kwa ajili ya kufanya upekuzi kisha akarudishwa kwenye kituo cha Oysterbay,” amesema.

Soma Zaidi>>>

BREAKING NEWS: Wema Sepetu afikishwa Mahakama ya Kisutu Dar

Mwigizaji  na mlimbwende  wa Miss Tanzania mwaka 2006, Wema Sepetu amefikishwa katika mahakama ya Hakimu Mkazi Kisutu leo Alhamisi Novemba Mosi, 2018.

Wema amefikishwa mahakamani hapo saa 4 asubuhi na kupelekwa katika chumba cha mahabusu kusubiri kusomewa mashtaka ya usambazaji wa picha za faragha mtandaoni

Amefikishwa mahakamani hapo akisindikizwa na polisi huku akiwa amevaa miwani na kujitanda ushungi.

 

==>>Endelea kuwa nasi kwa habari zaidi

Soma Zaidi>>>

Bodi Ya Nyama Yasema Nyama inayouzwa kwenye ndoo au kukatwa kwa kutumia magogo si salama

Bodi  ya Nyama Tanzania imetoa tahadhari kwa wananchi na kuwataka kuacha kula nyama  inayouzwa ikiwa imewekwa kwenye ndoo au kupangwa kwenye meza za mabucha kwa sababu  si salama kwa afya.

Vilevile imewataka wauza nyama kwenye mabucha kuacha kukata nyama kwa kutumia magogo kwa vile    wanahatarisha usalama wa walaji.

Akizungumza na waandishi wa habari   Dar es Salaam jana, Ofisa Nyama wa Bodi hiyo, Edgar Mbio, alisema  nyama hiyo na ile inayokaa buchani zaidi ya saa nne.

Mbio alisema kwa utaalamu nyama kama hiyo inakosa sifa ya kuwa na ubora unaofaa kwa matumizi ya binadamu.

“Biashara ya mifugo hufanyika machinjioni na buchani, hatutegemei kuona kinyume na hapo.

“Watu wanaonunua nyama kwenye meza… ndoo hizi ndizo zinazoleta madhara kwa sababu hazijakaguliwa, pia wale wanaonunua nyama ambayo imeshinda inanig’inia buchani nayo inakuwa imeshapoteza ubora kwa kuwa kwa kawaida nyama inapaswa kuhifadhiwa si zadi ya saa nane,” alisema Mbio.

Alisema wapo pia ambao hununua nyama katika  bucha  ambayo wanatumia vibao kukatia navyo si salama kwa sababu muuzaji anapokata anaacha ubora wa kitoweo hicho kwenye kibao.

Alisema mtu yeyote anayekula nyama iliyochinjwa na kuhifahiwa holela lazima apate madhara  kwa kuwa inakuwa si bora na salama hivyo haifai kwa matumizi ya binadamu.

Ofisa huyo alisema bodi ya nyama inaamini nyama bora na salama inaanzia kwa mfugaji kwa kufauta kanuni za ufugaji bora  zinazofuata taratibu ikiwamo kuuza  ng’ombe wa umri  chini ya miaka kumi.

Awali, Kaimu Msajili wa Bodi hiyo,  Imani Sichalwe aliwataka wananchi kuongeza kasi ya kula  nyama ili kufikia kilo 50 kwa mwaka  kwa kila mmoja.

Mbio alisema hicho  ndicho kiwango kilichopendekezwa na Shirika la Chakula na Kilimo la Umoja wa Mataifa (FAO).

Alisema takwimu zinaonyesha kila mwananchi nchini kwa kwa sasa anakula kilo 15 tu ya nyama  kwa mwaka hivyo   kuwa  na tofauti ya kiko 35  kwa kila mlaji.

“Tunakula nyama kwa kiwango cha chini ikilinganishwa  na  mahitaji yanayopaswa  ndani ya miili yetu.

“Pamoja na hali ya uzalishaji wa nyama nchini kuwa juu lakini bado watu hawali nyama,” alisema Sichalwe.

Alisema uchunguzi uliofanywa na bodi umebaini hali hiyo inatokana na bidhaa hiyo kuuzwa kwa bei ghali ambayo kwa wastani huuzwa kuanzia Sh 6,000 hadi Sh 15,000 kwa kilo moja.

Alisema ili kuboresha ulaji wa nyama bodi  imeanza kuhamasisha utumiaji wa mizani za digitali ambao utamuwezesha mlaji kununua kulingana na uwezo.

“Hii mizani itawaisaidia wananchi ambao wanahitaji kula nyama lakini  hawana fedha za kununua  kwa bei ya kiwango cha mizani iliyopo sasa.

“Mfano mwenye bucha akiwa na mzani wa digitali anaweza kumuuzia mlaji nyama hata ya Sh 500, tunaamini tutaongeza idadi ya walaji kwa njia hii,” alisema Sichalwe.

Alisema  kwa mujibu wa bajeti ya Wizara ya Mifugo na Uvuvi,   Tanzania ni nchi ya pili  ikifuatiwa na Ethiopiakwa mifugo mingi.

Kwa sasa nchi  ina   ng’ombe wapatao  milioni 30.5, mbuzi milioni 18.8, kondoo milioni 5.3, kuku wa asili milioni 38.2, kuku wa kisasa milioni 36.6, nguruwe milioni 1.9  na punda 595,160.

Alisema bajeti hiyo imeonyesha pia  uzalishaji nyama nchini   mwaka 2017/18  ulikuwa  tani 679,992  za nyama ya ng’ombe, mbuzi, kondoo na nguruwe.

“Kati ya  tani 2,608.93 za nyama, tani 1,030.78 ni za ng’ombe, tani 1,248.14 mbuzi, kondoo tani 50.00 na punda tani 280.00 ziliuzwa nje ya nchi,” alisema Sichalwe.

Alisema   tani 1,224.55 za nyama  ikiwamo nguruwe tani 506.05, ng’ombe tani 711.03 na kondoo tani 7.47 ziliingizwa ndani ya nchini.

Soma Zaidi>>>

Kesi ya Jamali Malinzi yakwama tena Mahakamani

Kesi  inayomkabili, aliyekuwa Rais wa Shirikisho la Mpira wa Miguu Tanzania (TFF), Jamal Malinzi na wenzake wanne imekwama kusikilizwa kwa sababu kiongozi wa jopo la mawakili wa utetezi, Richard Rweyongeza anaumwa.

Kesi hiyo imekwama kuendelea leo katika Mahakama ya Hakimu Mkazi Kisutu mbele ya Hakimu Mkazi Mkuu, Wilbard Mashauri.

Wakili wa Taasisi ya Kuzuia na Kupambana na Rushwa (Takukuru), Leonard Swai amedai kesi hiyo ilipangwa kwa ajili ya kusikilizwa, wamejiandaa na shahidi yupo mahakamani.

Wakili wa utetezi, Abraham Senguji aliieleza mahakama kuwa kiongozi wa jopo la mawakili wa utetezi, Wakili Rweyongeza bado anaumwa.

Wakili Rweyongeza yeye ndiye aliyemsikiliza shahidi wa nane anayeendelea kutoa ushahidi katika kesi hiyo upande wa mashtaka kwa kirefu, aliomba wapewe ahirisho fupi ili aweze kuwepo.

Hakimu Mashauri baada ya kusikiliza pande hizo mbili aliiahirisha kesi hiyo hadi Novemba 15, 2018 kwa ajili ya kutajwa.

Mahakama ilipanga  Novemba 21 na 22, mwaka huu kesi hiyo itasikilizwa kwa ushahidi wa mashahidi wa upande wa mashtaka.

Shahidi huyo wa nane wa upande wa mashtaka ni Katibu Mkuu wa Shirikisho la Mpira wa Miguu Tanzania (TFF), Kidao Mzigama Wilfred (41).

Washtakiwa katika kesi hiyo mbali na aliyekuwa rais TFF, Jamal Emil Malinzi(57) wengine ni Katibu Mkuu wa TFF, Mwesigwa Joas Selestine(46) na Mhasibu wa TFF,  Nsiande Isawayo Mwanga(27).

Meneja wa  Ofisi ya Shirikisho la Mpira wa Miguu Tanzania (TFF), Miriam Zayumba na Karani wa TFF, Flora Rauya ambao kwa pamoja wanakabiliwa na mashtaka 30 katika kesi ya jinai namba 213 ya mwaka 2017 yakiwamo ya kula njama, kughushi, kujipatia fedha kwa njia ya udanganyifu na utakatishaji wa fedha wa Dola za Marekani 173,335 na Sh 43,100,000.

Malinzi, Mwesigwa na Nsiande wapo rumande kwa kukabiliwa na mashtaka ya utakatishaji wa fedha kuwa miongoni mwa mashtaka  ambayo kwa mujibu wa sheria hayana dhamana huku wenzao Zayumba na Frola wapo nje kwa dhamana.

Soma Zaidi>>>

Wafanyakazi Watano Wa NEMC Wafikishwa Mahakamani Kwa Tuhuma Za Kughushi Saini Ya Waziri Januari Makamba

Wafanyakazi watano wa Baraza la Taifa la Hifadhi na Usimamizi wa Mazingira (Nemc) wamefikishwa Mahakama ya Hakimu Mkazi Kisutu wakikabiliwa na mashtaka sita ya uhujumu uchumi, ikiwamo kula njama na kughushi saini ya Waziri wa Nchi Ofisi ya Makamu wa Rais (Muungano na Mazingira), Januari Makamba.

Washtakiwa hao wamesomewa mashtaka hayo jana Jumatano Oktoba 31, 2018 na wakili wa Serikali, Faraja Nguka mbele ya Hakimu Mkazi Mwandamizi, Augustina Mmbando.

Akisoma mashtaka hayo, Nguka alidai washtakiwa hao wanakabiliwa na mashtaka sita ikiwamo la kula njama, mawili ya kughushi, kuwasilisha nyaraka ya uongo, kujipatia fedha kwa njia ya udanganyifu na kusababisha hasara ya Sh 160 milioni.

Wakati washtakiwa hao wakisomewa mashtaka hayo,  mshtakiwa mwenzao, ofisa mazingira wa Nemc, Magori Wambura (38) ambaye hakuwepo mahakamani, imetolewa hati ya kumkamata ili asomewe mashtaka yanayowakabili wenzake.

Washtakiwa waliosomewa mashtaka ni ofisa mazingira wa Nemc, Deusdith Katwale (38) mkazi wa Ubungo Msewe, mtaalam wa Tehama, Luciana Lawi (33) mkazi wa Ubungo Msewe, sekretari wa baraza hilo, Edna Lutanjuka (51) mkazi wa Mbezi Beach St Gasper, msaidizi wa ofisa Mwaruka Mwaruka (42) mkazi wa Ukonga Mombasa na ofisa mazingira NEMC, Lilian Laizer (27) mkazi wa Ukonga Mombasa.

Washtakiwa hao kwa pamoja wanadaiwa  kati ya Septemba  27, 2016 na April Mosi, 2018 Dar es Salaam walikula njama ya kutenda kosa la kughushi.

Katika shtaka la pili washtakiwa hao wanadaiwa kuwa  Oktoba 17, 2017 Dar es Salaam kwa udanganyifu walighushi cheti cha tathmini ya uharibifu wa mazingira chenye namba ya usajili EC/EIA/3366 wakijaribu kuonyesha kuwa cheti hicho ni halali na kwamba kimetolewa na Nemc wakati wakijua si kweli.

Katika shtaka la tatu wanadaiwa kuwa Oktoba, 2017 Dar es Salaam kwa nia ovu walighushi saini ya Makamba katika cheti cha tathmini ya uharibifu wa mazingira chenye usajili namba EC/ EIA/3366 wakijaribu kuonyesha kuwa cheti hicho ni halali na kimetolewa na Nemc wakati wakijua si kweli.

Katika shtaka la nne,  mshtakiwa Edna anadaiwa kuwa Oktoba  2017 katika ofisi za Nemc Makao Makuu Dar es Salaam kwa kujua alitoa cheti cha kughushi cha tathmini ya uharibifu wa mazingira chenye namba ya usajili EC/EIA/3366 cha Oktoba 17, 2017 kwa Deogratius Chacha, akijaribu kuonyesha kuwa cheti hicho ni halali na kimetolewa na Nemc wakati akijua si kweli.

Katika shtaka la tano, washtakiwa hao wote wanadaiwa kuwa kati ya Septemba 27 na Aprili 6 ,2018 walijipatia kwa njia ya udanganyifu Sh160 milioni toka kwa PMM Estate (2001) Ltd kwa madai kuwa wangeweza kufanya tathmini ya uharibifu wa mazingira na kumpatia cheti ambacho kinatolewa na Nemc kitendo ambacho si kweli.

Katika shtaka la sita washtakiwa hao wanadaiwa kuwa kati ya Septemba27, 2016 na Aprili 6, 2018 Dar es Salaam waliisababishia Nemc hasara ya Sh160 milioni.

Baada ya kusomewa mashtaka hayo, washtakiwa hao hawakuruhusiwa kuongea chochote kwa sababu mashtaka ya uhujumu uchumi Mahakama ya Kisutu haina mamlaka ya kuisikiliza hadi Mahakama Kuu.

Washtakiwa wamepelekwa rumande na kesi hiyo imeahirishwa hadi Novemba 14, 2018.

Soma Zaidi>>>